Hëna e plotë e dytë e vitit, e njohur si Hëna e Dëborës, do të shfaqet në kohën e duhur për Ditën e Shën Valentin.
Shkurti është gjithashtu muaji ideal për të parë Venusin, planetin e emëruar sipas perëndeshës romake të dashurisë, pasi këtë muaj ai shkëlqen më fort se kurrë, sipas NASA-s.
Kur do të ndodhë Hëna e Dëborës në 2025? Sipas NASA-s, Hëna e Dëborës do të arrijë kulmin e saj më 12 shkurt 2025. Sipas Old Farmer’s Almanac, hëna e plotë e shkurtit u quajt Hëna e Dëborës për shkak të reshjeve të mëdha të borës që ndodhin zakonisht në këtë periudhë të vitit. Ky almanak ka publikuar emrat e hënave të plota që nga vitet 1930.
Shumë fise indigjene amerikane në veriperëndim të SHBA-së e quanin këtë hënë edhe Hëna e Stuhive, për shkak të stuhive të shpeshta të borës, ose Hëna e Urisë, pasi kushtet e ashpra të dimrit e bënin gjuetinë më të vështirë. Çfarë tjetër mund të shihet në qiell gjatë shkurtit? Sipas NASA-s, shkurti do të sjellë një pamje mahnitëse të planetëve të ndritshëm, me Venusin në kulmin e tij dhe Jupiterin e Marsin që do të dominojnë qiellin e natës. Ja çfarë të kërkoni:
Mërkuri – Do të duket pak mbi horizont në fund të shkurtit, duke ndriçuar pas perëndimit të diellit.
Venusi – Planeti më i ndritshëm i muajit, i dukshëm në perëndim pas perëndimit të diellit.
Marsi – Do të shfaqet si një dritë portokalli në lindje çdo mbrëmje, duke u zhdukur disa orë para agimit.
Jupiteri – Një prani e ndritshme lart në qiell gjatë mbrëmjeve.
Saturni – Pak i zbehtë, por i dukshëm poshtë në perëndim menjëherë pas perëndimit të diellit, duke u ulur më poshtë gjatë muajit.
Nëse qielli është i kthjellët, nata e shkurtit do të ofrojë një pamje magjike përtej Hënës së Dëborës./ TAR/kb
