Siguria ushqimore është testi i radhës që Shqipëria duhet të kalojë… kjo si përpjekje për të fituar besimin e konsumatorëve e njëherazi për të marrë aprovimin e institucioneve të Bashkimit Europian.
“Kemi nevojë për vendimmarrje dhe transparencë që konsumatorët të kenë besim tek ajo që blejnë. Konsumatorët kanë nevojë për më shumë informacion. Shqipëria si kandidate për në BE ka një rol të rëndësishëm për të zbatuar standardet e BE, që konsumatorët shqiptarë të gëzojnë të njëjtën mbrojtje dhe nivel besimi ashtu sikurse qytetarët e BE”, shprehet Laszlo Arendas, Menaxher i Programit për Bujqësi.
Në funksion të rritjes së sigurisë ushqimore, qendra “Alert” ka prezantuar për konsumatorët linjën e gjelbër ku mund të bëjnë ankesën dhe denoncimin e tyre në rast se konstatojnë problematika.
“Linja jeshile është risi për mbrojtjen e konsumatorëve dhe mundësi për ata, në një kohë kur shumë inspektorate për mbrojtjen e konsumatorëve nuk kanë numra jeshilë, ose nuk funksionojnë”, deklaroi Granit Sokolaj.
Kjo pranohet edhe nga Ministria e Bujqësisë dhe Zhvillimit Rural.
“Duhet të ndryshojmë tërësisht mendësi dhe të bashkëpunojmë pasi përndryshe nuk mund të kemi sukses”, tha Arjan Jaupllari.
Forcimi i sistemit kombëtar të kontrollit agro-ushqimor vlerësohet si një përgjegjësi e përbashkët që përfshin palë të ndryshme të interesit, duke përfshirë organet qeveritare, industrinë ushqimore dhe konsumatorët./e.t
