Pas kreut të Shtëpisë së Bardhë Donald Trump, edhe presidenti francez Emmanuel Macron uroi Presidenten e Kosovës, Vjosa Osmani, me rastin e 17-vjetorit të Pavarësisë të Republikës së Kosovës dhe thekson përkushtimin e Francës për perspektivën evropiane të Kosovës.
Në një mesazh për Presidenten Osmani, Presidenti francez Emmanuel Macron ka shprehur urimet e tij për pavarësinë e Kosovës dhe ka ritheksuar mbështetjen e Francës për forcimin e pavarësisë së Kosovës. Ai theksoi rëndësinë e rikonfirmimit të perspektivës evropiane për Kosovën dhe të gjitha vendet e Ballkanit Perëndimor.
Macron ka shprehur mbështetje për normalizimin e marrëdhënieve mes Kosovës dhe Serbisë, duke e konsideruar këtë si një hap thelbësor për përparimin e procesit të integrimit evropian të Kosovës. Ai gjithashtu ka theksuar nevojën e avancimit në zbatimin e Marrëveshjes së Brukselit-Ohrit, duke përfshirë themelimin e Asociacionit të komunave me shumicë serbe.
Presidenti francez ka shprehur gjithashtu gatishmërinë e Francës për të mbështetur organizimin e Lojërave Mesdhetare në vitin 2030 në Kosovë dhe ka falënderuar Presidenten Osmani për pjesëmarrjen në ceremoninë e rihapjes së Notre-Dame de Paris. Ky mesazh i Presidentit Macron është një tjetër dëshmi e angazhimit të Francës për forcimin e marrëdhënieve bilaterale dhe përkrahjen e Kosovës në rrugën e saj drejt zhvillimit dhe integrimit evropian.
Urimi i plotë
Zonja Presidente, e dashur Vjosa
Me rastin e festës kombëtare të Republikës së Kosovës, dëshiroj t’ju shpreh urimet e mia dhe t’ju ritheksoj gjithë përkushtimin që Franca ka për pavarësinë e Kosovës.
Përballë çrregullimeve dhe fragmentimit të botës, perspektiva evropiane e Kosovës, si e të gjitha vendeve të Ballkanit Perëndimor, duhet të rikonfirmohet. Ju siguroj për përkrahjen e Francës për të mbështetur vendin tuaj në këtë rrugë.
Në këtë drejtim, normalizimi i marrëdhënieve me Serbinë është një hap thelbësor. Emërimi i një Përfaqësuesi të ri special të Bashkimit evropian duhet të jetë një mundësi për të bërë përparim në zbatimin e Marrëveshjes së Brukselit-Ohrit, duke përfshirë themelimin e Asociacionit të komunave me shumicë serbe.
Shpresoj gjithashtu që dy vendet tona, të lidhura me vlerat e Olimpizmit, të mund të vazhdojnë të bashkëpunojnë, veçanërisht lidhur me organizimin e Lojërave Mesdhetare në vitin 2030 në Kosovë. Franca është e gatshme t’ju ndihmojë që kjo ngjarje madhore të ketë një sukses të plotë.
Së fundi, dëshiroj t’ju falënderoj për pjesëmarrjen tuaj në ceremoninë e rihapjes së Notre-Dame de Paris, për të cilën ju jam mirënjohës.
Ju lutem pranoni, zonja Presidente, konsideratën time më të lartë.
Përzemërsisht,
Emmanuel MACRON
/e.t
