Kryetari i PD, SaliBerisha, gjatë prezantimit të programit qeverisës 2025-2029, u shpreh se për të luftuar varfërinë, kërkohet një sulm frontal përmes një pakete emergjence që ka për qëllim të zhdukë varfërinë ekstreme.
Lideri demokrat iu referua Kukësit ku sipas tij, sapo erdhi në pushtet Edi Rama hoqi ndihmën ekonomike për 20 mijë banorë në Kukës, sepse votuan kundër, sepse qarku votoi kundër PS-së.
“Dhe Shqipëria atë vit duhet të shtonte, kishte 120 mijë qytetarë në ndihmë ekonomike, duhet të shtonte të paktën edhe 60 mijë të tjerë me regjistra dhe po të shtonte dhe këta 60 mijë e të shtonte ndihmën ekonomike, Shqipëria do të realizonte atë që do të realizojmë ne tani. E përjashtonte varfërinë ekstreme apo mjerimin”, tha Berisha.
Sipas tij, ky është një qëndrim armiqësor ndaj shqiptarëve dhe kjo merr fund në 3 muajt e parë të qeverisjes së PD.
“Qoftë me minimumin jetik, qoftë me rrogën minimale që do të jetë 500 euro, qoftë me kartën e konsumatorit për të gjithë familjet në nevojë apo personat në nevojë që marrin rrogë 500 euro apo marrin minimumin jetik 200 euro”.
Berisha tha se kjo paketë emergjence nuk zhduk varfërinë, sepse varfëria ekziston në çdo vend. “Por varfëria ekstreme në një vend me situatën ekonomike të Shqipërisë, ekziston sepse ai vend vidhet dhe vetëm vidhet nga qeveritarët”, tha Berisha./ S,M
