Kryeministri Edi Rama ka dhënë mbrëmjen e sotme një intervistë për emisionin ‘Pamja e Madhe’ në televizionin grek MEGA.
Rama tha se minoriteti grek në Shqipëri nuk ka asnjë problem më shumë me pronat, se ato problematika që kanë edhe shqiptarët etnikë.
Ai shtoi gjithashtu se është marrëzi të flitet për grabitje të pronave të minoritetit grek, gjë për të cilën sipas kryeministrit, nuk ka asnjë provë.
Shefi i Qeverisë foli edhe për ndërtimin e shkollave greke, për të cilat tha se mund të jetë shumë e thjeshtë nga ana e qeverisë shqiptare që të realizohet, por problemi sipas tij, qëndron në faktin se nuk ka mësues.
“Meqë ra fjala kryeministri juaj është mjaft i vëmendshëm ndaj çështjeve të pakicës greke në Shqipëri. Ne mund të hapim shkolla publike apo private për minoritetin grek, por duket që jut ë dërgoni mësues. Nuk ka asnjë problem për grekët etnikë në Shqipëri. Ka pasur në të shkuarën disa probleme, por tani nuk ka më. Probleme me pronat ka edhe për shqiptarët etnikë. Por të flasësh për grabitje është e tepërt.
Nuk ka asnjë rast që ndonjë pronë private të jetë marrë nga qeveria. S’ka asnjë rast të tillë. Së dyti të gjitha hotelet, resorted dhe gjithçka tjetër, është ndërtuar mbi baza private, mbështetur në kontrata. Problemi me titujt e pronësisë është pjesë e historisë. Nuk është se nuk i kanë të gjithë. Ka që i kanë këta tituj dhe për investime të ndryshme lidhin kontrata dhe marrin para. Në të kundërt nuk jepen lejet e ndërtimit”, tha Rama./E.T
