Seanca paraprake në GJKKO ka përfunduar pa një vendim lidhur me dosjen e privatizimit të ish-kompleksit “Partizani”, ku në akuzë është ish-kryeministri Sali Berisha dhe dhëndri i tij, Jamarbër Malltezi. Sot përfundoi mbrojtjen biznesmeni Fatmir Bektashi i cili ndodhet në masën e sigurisë detyrim paraqitje.
Gjykata ka njoftuar se seanca e ardhshme do të zhvillohet në datën 6 mars.
Noterja Andia Pustina dhe përfaqësuesit e kompanisë së ndërtimit Homeplan do të paraqesin argumentet e tyre.
Në përfundim, gjyqtarja Flojera Davidhi do të shprehet për kalimin ose jo në gjykim të dosjes.
Pas përfundimit të seancës së sotme avokati Genc Gjokutaj theksoi edhe një herë kërkesën e unifikuar të mbrojtjes së të pandehurve për pushimin e çështjes.
“Të gjithë kanë kërkuar pushimin e çështjes për mungesën e faktit penal. Nuk ka çështje. Të gjithë subjektet personat por dhe mbrojtësit jemi në një unison sepse është një çështje e tërë e stisur dhe ka një shkak të përbashkët, mungesën e faktit penal. E gjatë sepse është voluminoze. Nuk ka lëndë brenda, kemi kërkuar pushimin e çështjes. Pastaj do shikojmë si do veprojë gjykata. Në këtë çështje nuk ka alternativë. Në vizionin tonë, mungesa e faktit penal, nuk lë shteg për alternativë. Ata kanë kryer veprime voluminoze, kanë dalë dhe jashtë objektit. Nuk mund të bëjmë kërkesa të pakuptimta”, tha Gjokutaj./e.t
