Një foshnjë lindi me një gjendje të rrallë që bëri që ai të kishte veshin e djathtë në faqe dhe pa syrin e djathtë, një gjendje që i “tronditi” prindërit pasi ata kishin pasur një shtatzëni normale.
Kur Vinnie James lindi katër muaj më parë, ai “nuk po merrte frymë”, thotë i ati, 26 vjeç, sipas The Daily Mail.
“E çuan me nxitim në një tavolinë, dhe unë nuk dija çfarë të bëja, kështu që shkova në tualet dhe fillova të lutesha,” tha James. Kur e pa të birin, “vërejta një vesh të vogël në faqen e tij të djathtë. Nuk e kuptova çfarë kishte ndodhur, u trondita vërtet në atë moment.”
James tha se i biri u dërgua menjëherë në operacion pas lindjes; Vinnie më pas kaloi 65 ditë në spital për ndërhyrje mjekësore pas diagnostikimit me sindromën Goldenhar.
Kjo është një gjendje e rrallë që karakterizohet nga zhvillimi jonormal i syrit, veshit dhe shtyllës kurrizore, sipas Spitalit të Fëmijëve në Filadelfia. Zakonisht ndikon vetëm në njërën anë të trupit, në rastin e Vinnie-t, anën e djathtë, por mund të prekë gjithashtu zemrën, veshkat, mushkëritë dhe sistemin nervor.
Klinika Cleveland vlerëson se kjo sindromë prek nga 1 në 3500 deri në 1 në 25,000 lindje.
“Nuk e dinim çfarë ishte, ishim vërtet të tronditur dhe nuk ishim të përgatitur për këtë. Qëndruam aty, të hutuar dhe të lodhur,” thotë James, duke thënë se ky ishte vetëm fillimi i një rruge të gjatë mjekësore për të birin./k.k
