Qeveria shqiptare ka miratuar sot një vendim që parashikon masa të posaçme mbrojtjeje për punonjësit e policisë, familjarët dhe pronat e tyre, kur kërcënohen nga krimi i organizuar gjatë ushtrimit të detyrës.
Ministri i Brendshëm, Ervin Hoxha, deklaroi se ky akt synon të forcojë bashkëpunimin mes SHISH dhe SPAK në luftën kundër krimit të organizuar.
Vendimi përcakton dy forma për të siguruar mbrojtjen e punonjësve të policisë:
- Forma e parë: Mbrojtja e menjëhershme, ku Drejtori i Policisë së Shtetit lëshon urdhër të drejtpërdrejtë për mbrojtjen e punonjësit të kërcënuar.
- Forma e dytë: Punonjësi i policisë i drejtohet komisionit për mbrojtjen nga kërcënimet përmes procedurave të përcaktuara.
“Përmes këtij akti hapet një udhëtim i ri për sakrificën dhe mbrojtjen e punonjësve të policisë. Ky është një tregues i qartë se jeta, shëndeti dhe prona e punonjësve të policisë janë prioritet,” tha ministri Hoxha gjatë deklaratës për mediat pas mbledhjes së qeverisë./ S,M
