Deputetja Flutura Açka, në një intervistë televizive, ka shpjeguar arsyet e tërheqjes së saj nga politika, duke kritikuar zhvillimet brenda Partisë Demokratike.
Në lidhje me tërheqjen e saj nga politika, Açka theksoi se ishte një vendim personal, por kritikoi gjendjen e Partisë Demokratike, duke u shprehur se e djathta është më e përçarë se kurrë.
“PD dhe e djathta në përgjithësi po varaviten në një ligati, që jo vetëm nuk u përpoqëm ta bënim të performonte më mirë, por e ndotëm dhe e copëtuam edhe më shumë,” u shpreh ajo.
Sa i përket listës së kandidatëve të Sali Berishës, Açka tha se nuk kishte pritur ndonjë risi, duke argumentuar se ajo është e mbushur me besnikët e tij.
“Berishës i duhen ‘pushkë të nxehta’ dhe njerëz besnikë që të jenë një lloj armate për të. Të jesh besnik i Berishës sot, kur shqiptarët përballen me sfida të shumta, është një çështje që duhet analizuar më thellë,” përfundoi Açka./ S,M
