Ka marrë fund armëpushimi mes Hamasit dhe Izraelit, me këtë të fundit që ka nisur sulmet në orët e parë të së martës mbi Gaza.
Ministria e Shëndetësisë në Gaza ka njoftuar se 220 persona kanë humbur jetën si pasojë e sulmeve.
Një nga të vrarët ishte Mahmoud Abu Wafah, zyrtari më i lartë i sigurisë së Hamasit në Gaza. Por shumë civilë, duke përfshirë fëmijë, kanë humbur jetën.
Kjo është vala më e madhe e sulmeve ajrore në Gaza që nga fillimi i armëpushimit më 19 janar.
Forcat e Mbrojtjes të Izraelit (IDF) thanë se kishin shënjestruar ato që i quajtën “objektiva terroriste” që i përkisnin Hamasit.
Kryeministri izraelit Benjamin Netanyahu dhe ministri i Mbrojtjes Israel Katz urdhëruan sulmet të martën në mëngjes, sipas një deklarate nga zyra e kryeministrit.
“Kjo vjen pas refuzimit të përsëritur të Hamasit për të liruar pengjet tanë, si dhe refuzimin e tij të të gjitha propozimeve që ka marrë nga i dërguari presidencial i SHBA Steve Ëitkoff dhe nga ndërmjetësit. Izraeli, që tani e tutje, do të veprojë kundër Hamasit me fuqi ushtarake në rritje. Plani për sulmet u prezantua nga IDF gjatë fundjavës dhe u miratua nga udhëheqja politike”, tha ai.
Ambasadori i Izraelit në OKB, Danny Danon, paralajmëroi Hamasin që të lirojë të gjithë pengjet, duke thënë se ne nuk do të tregohet mëshirë për armiqtë.
Hamasi ka akuzuar Izraelin për tradhti për përmbysjen e marrëveshjes së armëpushimit. Grupi gjithashtu thotë se Izraeli po ekspozon pengjet e mbetura izraelitë të mbajtur në Gaza ndaj një “fati të panjohur”.
Por Hamasi nuk ka deklaruar ende se po rifillon luftën, përkundrazi u bën thirrje ndërmjetësve dhe Kombeve të Bashkuara të ndërhyjnë.
Një zyrtar izraelit tha për CBS se qeveria izraelite e njoftoi Shtëpinë e Bardhë përpara se të niste sulmet./K.K
