Pas aksidentit tragjik të ndodhur në Fushë Prezë, shoferi i betonierës Aleksandër Krrashi, 24 vjeç, është arrestuar për tre vepra penale: “Largimi nga vendi i aksidentit”, “Shkelje e rregullave të qarkullimit rrugor” dhe “Drejtimi i automjetit në mënyrë të parregullt”.
Mësohet se i riu nuk ishte i pajisur me leje drejtimi për mjetet e transportit të rëndë. Ai pasi u ndalua nga policia ka pohuar se ishte larguar për shkak se ishte i tronditur nga ngjarja.
Nga verifikimet paraprake ka rezultuar se betoniera nuk ka pasur shenja dalluese ndriçuese në momentin që ka hyrë në rrugën kryesore dhe për disa metra ka vijuar lëvizjen deri në momentin që përplaset me të mjeti tip Benz.
Të njëjtat burime sqarojnë se mjeti tip Benz ka lëvizur me shpejtësi tej normave të lejuara. Në këtë mjet udhëtonin Enejdi Laçi, Erildi Laçi, Enrikejd Kurti dhe Andi Laçi, të cilët humbën jetën tragjikisht pasi mjeti shpërtheu në flakë.
Para aksidentit ata ndodheshin në aeroportin e Rinasit, ku kishin pritur Erildi Laçin, i cili kishte ardhur nga Gjermania.
Ndërkohë nga ana tjetër, në një hetim paralel po kryhet edhe për pronarët dhe administratorët e firmës në lidhje me punësimin e shoferit 24 vjeçar, drejtuesi i betonierës, që nuk ishte i pajisur me leje drejtimi për mjetet e transportit të rëndë./e.t
