Qeveria Shqiptare ka miratuar zonat ku do të lejohet kultivimi i kanabisit për qëllime mjekësore dhe industriale, me Malësinë e Madhe si zonën kryesore në veri të vendit.
Ky vendim vjen në një kohë kur tregjet europiane dhe amerikane të bimëve medicinale janë të tejngopura, duke lënë fermerët vendas në vështirësi. Për këtë arsye, agronomi Kujtim Rrukaj e sheh kanabisin medicinal si një mundësi të re për ta.
Ligji për kultivimin e kërpit industrial u miratua për herë të parë në vitin 2001, por ngatërresa mes tij dhe kanabisit sativa ka sjellë pasoja të rënda për fermerët.
Më shumë se 50 banorë të Malësisë së Madhe përfunduan në burg dhe kaluan vite të tëra në dyert e gjykatave, pasi u akuzuan se nuk kultivonin kërp industrial, por kanabis me përmbajtje të lartë THC.
Ramadan Mema, banor i Malësisë së Madhe dhe një nga specialistet me të vjetër të shkencave bujqësore, e mbështet këtë iniciativë dhe shprehet i gatshëm që pronat e tij t’i vërë në dispozicion për kultivimin e kësaj bime.
Në 11 nga 17 zonat e miratuara, Gruemira në Malësinë e Madhe bëhet epiqendra e kultivimit të kanabisit për qëllime mjekësore në vendin tone.
Ky vendim hap një kapitull të ri për këtë zonë, që deri dje njihej më shumë për bujqësinë tradicionale ndërsa Shqipëria hedh hapat e parë drejt një industrie të re ku kanabisi nuk do të jetë me, thjesht një histori e kronikës së zezë./k.k
