Kryeministri Edi Rama ka bërë me dije se në partneritet me Mastercard Europe, sot çelet Programi për Përshpejtimin e Pranimit të Pagesave Elektronike, që sipas qeverisë është një hap konkret për të reduktuar informalitetin dhe për të rritur ritmin e zhvillimit të ekonomisë shqiptare.
Gjatë fjalës së tij Rama nuk ka kursyer as thumbat, ku është shprehur se dita të mira po vijnë për tregun dhe bankat.
Duke u ndalur te këto të fundit, kryeministri tha se bankat kanë gjithnjë ditë të mira se janë i vetmi biznes në planet që kur nuk iu ecën ua rrasin klientëve, gjë që sipas Ramës qeveria nuk e bën dot kurrë këtë punë.
“Unë besoj se sot është një ditë shumë e mirë për ne, për tregun, për bankat. Bankat kanë gjithmonë ditë të mira këtu në Shqipëri. Janë i vetmi lloj biznesi në planet që kur nuk i ecën mirë ua rrasin klientëve, qeveria nuk e bën dot kurrë këtë punë. Është një ditë e mirë për mastercardin edhe pse është një elefant i madh por në tregun tonë të vogël ne kemi konsumatorë agresivë”, tha Rama./ S,M
