Kryeministri Edi Rama, njëkohësisht kryetari i PS-së, do të shpalosë sot programin e Partisë Socialiste për Shqipërinë 2030 me të cilën do të kërkojë dhe votën e shqiptarëve në zgjedhjet e11 majit.
Dje përmes një postimi në facebook Rama ndau fotot ku në sfond është flamuri shqiptar dhe në një tjetër ku duket flamuri i BE, një simbolikë e objektivit kryesor të këtij programi për zhvillimin e vendit në këtë dekadë dhe integrimin në BE.
Programi i PS-së “Shqipëria 2030” synon të japë një perspektivë reale me një program qeverisës të ndërtuar mbi strategji të mirëpërcaktuara, për çdo fushë.
Ndërkohë integrimi në BE brenda 2030 për ti dhënë shqiptarëve pasaportën e Bashkimit Europian mbetet prioritet i PS-së në këtë fushatë elektorale.
Në zgjedhjet e 11 majit, Rama u kërkon shqiptarëve votën për një mandat të katërt.
Ndërkohë pasdite i rikthehet turit të diasporës. Kryesocialisti do të jetë në Kretë në një takim me shqiptarët në stadiumin Kladissos në orën 18:00 (17 me orën në Shqipëri) ./ S,M
