Në një intervistë me Bruna Çifligun në A2 CNN ajo tha se vendi ynë ka pësuar regres gjatë dekadës së fundit. Pas pjesëmarrjes në një reality show ajo tha se marrë mbështetje nga elektorati gri dhe se synon të përfaqësojë shqetësimet e qytetarëve të zakonshëm.
“Ky regjim nuk përputhet me shijet e mia. U futa në reality show për t’u qasur më shpejt me publikun. Dua që fjala liri dhe demokraci të jenë të vërteta dhe funksionale në këtë demokraci kaq të brishtë,” u shpreh ajo, duke theksuar nevojën për rrotacion politik dhe bashkimin e forcave opozitare për një qeverisje më të fortë dhe efikase.
Julia Ilirjani e sheh veten si një zë të fortë në Parlament, duke premtuar se do të mbrojë interesat e qytetarëve dhe do të denoncojë problemet e tyre ekonomike dhe sociale.
“Veten në parlament e shoh si grua që çoj të gjithë shqetësimet e të përditshmes. Nuk do flas broçkulla dhe të bëj luftë ndërpersonale me kundërshtarët e mi politikë. Gjërat duhen folur dhe po u folën 1, 2, 3 herë do u “thyej” foltoren derisa t’i dëgjojnë mirë ato që do them”, theksoi Ilrijani.
Duke kritikuar qeverisjen aktuale, Ilirjani theksoi se ekonomia është një ndër shqetësimet kryesore të qytetarëve, teksa përmendi rritjen e çmimeve të banesave dhe vështirësitë ekonomike të familjeve shqiptare.
“Lustraxhinjtë e kësaj qeverie janë të paparë. Edhe vendet e punës i marrin me shumë lustra. Ajo që unë shoh vërtet janë disa njerëz më të ngrysur, me më pak para për ata që punojnë me punë të ndershme, 500 euro ka vajtur një garsionere brenda unazës. 800 euro një banesë me qira. Një qytetar më tha; bëj nga 3 punë dhe zihem çdo ditë me gruan se nuk gjejmë harmoni se litari ekonomik po na mbyt çdo ditë. U është hedhur një litar që është rrogë dhe atë e liron e shtrëngon”.
Në përfundim, ajo bëri thirrje për pjesëmarrje masive në zgjedhje, duke vënë theksin te përgjegjësia qytetare për të ardhmen e vendit.
“Amerika më mësoi që ne populli jemi në pritje, ne duhet të dalim të votojmë. Është një detyrim që ia kemi të ardhmes së fëmijëve tanë,” tha ajo./ S,M
