Presidenti amerikan Donald Trump po përpiqet të arrijë marrëveshje me një sërë vendesh të tjera për të dërguar emigrantët e deportuar nga Shtetet e Bashkuara.
Siç raporton “Wall Street Journal”, mes vendeve të cilave Trump u ka kërkuar të pranojnë të deportuarit ështe edhe Kosova. Media amerikane pretendon se SHBA po shpreson që këto vende, ku përfshihen gjithashtu Libia, Ruanda, Moldavia e Mongolia, do të pranojnë kërkesën në këmbim të marrëveshjeve financiare apo përfitimeve politike për ndihmën që do t’i ofrojnë Trump të përmbushë një prej prioriteteve kyçe.
Modeli i preferuar nga Uashingtoni bazohet tek marrëveshja që administrata arriti me Panamanë në muajin shkurt, sipas së cilës dërgoi avionë me deri në 100 emigrantë nga Lindja e Mesme. Panamaja fillimisht i mbajti ata në qendra ndalimi dhe më vonë u angazhua për t’i dërguar në vendet e origjinës.
Siç thuhet, zyrtarët amerikanë janë duke biseduar me vende në Afrikë, Azi dhe Europën Lindore, por jo domosdoshmërisht do të nëshkruajnë ujdi formale. Sipas Wall Street Journal, ajo që i ndodh emigrantëve të deportuar do të varet nga vendi pritës.
Më herët, Presidenti amerikan Donald Trump ka sugjeruar se edhe Shqipëria mund të ishte një vend që do të mirëpriste refugjatë palestinezë të shpërngulur nga Gaza./e.t
