Kryetari i Koalicionit Euroatlantik, Lulzim Basha, zhvilloi sot (2 prill) takim elektoral me mbështetësit në Njësinë nr. 8 në Tiranë, ku prezantoi edhe kandidatin e partisë Pëllumb Seferin, (emrin e të cilit ia lakon kryeministrit Rama në video-postimet virtuale në rrjetin social së fundmi).
Teksa foli për programin e KEA dhe kandidatët, ai iu drejtua me mesazh direkt kreut të qeverisë, teksa theksoi se i shmanget prej disa javësh pyetjes se ku i ka shokët.
“Rama ka 1 muaj që nuk tregon se ku i ka shokët. Korrupsioni pengon zhvillimin e vendit, ai premtoi 300 mijë vende pune, shëndetësi falas dhe dëboi shqiptarët. Shqipëria 313 është projekti i vërtetë i Edi Ramës. I futi për herë të dytë në kolaps pronarët e pronave. Korrupsioni shkaku kryesor i braktisjes e boshatisjes së vendit. Solli kriminelët, hajdutët, të korruptuarit, përdhunuesit në pushtet”, tha mes të tjerash ai.
Më tej Basha i bëri thirrje qytetarëve që pas 12 viteve të mos votonin më “si dele” për mazhorancën që e ka ndarë pushtetin mes qeverisë dhe 313-ës.
“Koha t’i vini gishtin kokës dhe të shihni në sy fëmijët se kur të votoni do zgjidhni përsëri si dele pa tru një njeri që ju ka mashtruar me premtime dhe që tani e ka të ndarë shtetin mes qeverisë dhe 313-ës. Apo do i thoni jo Edi Ramës dhe qeverisë së tij të korruptuar”, tha kreu i KEA.
Ai ironizoi politikisht Ramën, duke nënvizuar se për t’i shpëtuar situatës së vështirë politike, shpiku edhe ‘bufin e kënetës’ dhe “gogolin” për shqiptarët.
“Shpiku bufin, e tha o unë, o ai! (Berisha). Nxori gogolin para shqiptarëve, por jo nuk duhet të rrini mes atyre dy kurtheve, që kanë mbyllur ciklin politik dhe kanë atë penal tani. Zgjidhja për ju është Koalicioni Euroatlantik, numri 4. Ne nuk bëjmë presione apo mbajmë peng me dosje të Sigurimit të Shtetit. Ne jemi të papërlyer, nuk kemi frikë përveç Zotit. Nuk jemi të korruptuar”, ironizoi Basha.
Sikurse gara më e fundit mes forcave të mëdha me akuza për vjedhje të programit, edhe Basha iu bashkua ‘luftës’ Rama-Berisha, duke thënë se këta dy ia kanë vjedhur programin Demokratëve Euroatlantikë.
“Kemi programin më të mirë, i vlerësuar edhe nga ndërkombëtarët. Por tani pas censurës së tij, po e kopjojnë si kopjacë të vërtetë, e marrin me copa dhe e shfaqin si të tyrin. Nuk ka vezë qyqesh në mesin tonë, si te partitë e rrangallave të korrupsionit, pra kush merr vota më shumë shkon në Parlament”, tha Basha mes të tjerash./e.t
