Kryeministri Edi Rama, gjatë takimit të nivelit të lartë “Shqipëria 2030 në BE – Rruga e Reformave”, theksoi përkushtimin e palëkundur të Shqipërisë ndaj integrimit evropian, duke përdorur një krahasim historik për besnikërinë ndaj perandorive.
“Ne ndahemi nga perandoritë vetëm kur ato ndahen nga vetvetja. Nëse një ditë ju çmendeni dhe dëshironi të shkatërroni BE-në, ne nuk e lëmë. Do ta krijojmë qendrën e BE-së në Shqipëri, Brukseli do të jetë në Tiranë,” u shpreh Rama duke krahasuar situatën me kohën e pushtimit otoman kur Shqipëria ishte pjesë e perandorisë asokohe.
Duke riafirmuar angazhimin e vendit për anëtarësim, ai tha se Shqipëria do të jetë ndër të fundit që do të largohej nga projekti evropian, nëse ndonjëherë ai do të shpërbëhej.
“Ne jemi shumë besnikë ndaj perandorive. Ne ndahemi nga perandoritë pasi ato ndahen nga vetëvetja. Kur otomanët e lanë atë punë, pastaj dolëm ne. Kështu do jetë dhe me BE-në. Nëse një ditë ju çmendeni dhe do doni ta shkatërroni BE-në ne nuk e lëmë. Do krijojmë qendrën në Shqipëri. Brukseli do jetë në Tiranë. Kush të dojë do rrijë me ne, por ne do jemi sërish të fundit”, tha Rama./e.t
