Kreu i Ballit Kombëtar, Adriatik Alimadhi është vënë vënë nën hetim nga policia e Tiranës për veprën penale “Kundërshtim i punonjësit të rendit publik”. Në videon e bërë publike nga eksponentë të Partisë Demokratike, duket momenti kur forcat e policisë shoqërojnë 61-vjeçarin që ndodhej në ambientet e një lokali në rrugën e Dibrës.
Pas shoqërimit, Sekretari i Përgjithshëm i PD, Flamur Noka reagoi në rrjetin e tij social se Alimadhi ndodhej në kafenenë e vëllait të tij kur kërkoi të mësonte nga policia arsyen e kontrollit, që sipas tij është bërë dhunshëm dhe pa mandat.
Zyrtarisht policia sqaroi se Adriatik Alimadhi u shoqërua nga forcat e rendit pasi nuk iu bind urdhrit të efektivëve që kishin shkuar në lokal për të ushtruar kontroll mbi dyshimet se aty mund të ushtrohej veprimtaria e paligjshme e lojërave të fatit dhe basteve sportive.
Për rastin reagoi edhe kreu i Partisë Demokratike Sali Berisha.
“Nga ky regjim që riktheu në Shqipëri burgosjet politike, persekutimin politik. Nga ky regjim që në vitin elektoral vendos të arrestojë liderët e tre partive kryesore opozitare dhe më së fundmi mbrëmë, në mënyrën më brutale, më staliniste, arreston kryetarin e një partie tradicionale, të Ballit Kombëtar, në lokalin e tij, vetëm pse u kërkoi, i pyeti: çfarë doni, pse keni ardhur, një bande me reformë. Nga ky regjim që nuk njeh ligj, nuk njeh Kushtetutë, nuk njeh normë as moral kur vjen puna për të grabitur, plaçkitur pasuritë e shqiptarëve, buxhetin dhe për t’i zhytur ata gjithnjë e më thellë në mjerim”.
Ndërkohë, Agjencia e Mbikëqyrjes Policore ka nisur verifikimet në lidhje me pretendimet e ngritura nga përfaqësues të opozitës. /E.T
