Për të dytën ditë me radhë, tregjet e aksioneve globale reflektuan tronditje për shkak të tarifave ndaj importeve të vendosura nga presidenti Donald Trump. Bursat në SHBA kanë hyrë në javën më të keqe që prej pandemisë së Covid-19 në 2020-tën, me të treja indekset kryesore në Wall Street, që ranë me më shumë se 5 përqind, e përkthyer në shifra, 5 trilion dollarë humbje në dy ditë.
Oficerët e doganave në SHBA nisën prej kësaj të shtune të mblidhnin taksat prej 10 përqind ndaj importeve nga shumë vende, ndërsa tarifat më të lartat ndaj 57 partnerëve më të mëdhenj tregtar do të nisin nga java e ardhshme. Mes vendeve të para të prekura nga tarifat e reja janë Australia, Britania e Madhe, Kolumbia, Argjentina, Egjipti dhe Arabia Saudite. Kina u bë shteti i parë që njoftoi implementimin e kundër masave të ngjashme ndaj SHBA duke përshkallëzuar luftën tregtare mes dy vendeve.
Nga e enjtja tjetër, mallrat amerikane që do të hyjnë në kinë do të taksohen me 34 përqind. Duke reaguar ndaj tërmetit në bursë Pekini tha se tregjet e aksioneve kishin folur, duke refuzuar tarifat e Trump. Kina kërkoi konsultime më SHBA ndërsa shoqata të ndryshme tregtare në këtë vend bënë thirrje për eksplorimin e tregjeve alternative, dhe paralajmëruan se tarifat do të përkeqësojnë inflacionin.
Trump njoftoi tarifa shtesë prej 34 përqind ndaj mallrave kineze , duke e çuar totalin e taksave të vendosura ndaj rivalit tregtar në 54 përqind. Mes shqetësimeve për zhvillimet dramatike në tregjet e aksioneve, Donald Trump reagoi në platformën sociale truth për të mbështetur vendimin. “Bizneset e mëdha nuk janë të shqetësuara nga tarfiat pasi e dinë se ato janë këtu për të qëndruar, por janë të fokusuar tek ky vendim i madh që do të rikarikojë ekonominë tonë”, ishin fjalët e Trump. /E.T
