Në prag të zgjedhjeve parlamentare të 11 majit, OSBE dhuroi pajisje teknologjike për SPAK-un, duke mbështetur Task-Forcën e posaçme për parandalimin dhe hetimin e shkeljeve zgjedhore. Kjo nismë synon të rrisë vigjilencën ndaj blerjes së votave, presioneve ndaj zgjedhësve dhe keqpërdorimit të burimeve shtetërore në procesin zgjedhor. Me këtë mbështetje, SPAK forcon kapacitetet për të garantuar zgjedhje më të lira dhe transparente.
Në kuadër të përgatitjeve për zgjedhjet parlamentare të 11 majit, Prezenca e OSBE-së në Shqipëri ishte dje në SPAK për të mbështetur institucionin në forcimin e hetimeve ndaj krimeve zgjedhore. Për këtë qëllim, OSBE i dorëzoi SPAK-ut një sërë pajisjesh teknologjike që do të ndihmojnë Task-Forcën e posaçme të ngritur për ndjekjen e shkeljeve gjatë procesit zgjedhor. Donacioni përfshin 25 laptopë, 25 printera/skanera dhe aksesorë që do të përdoren nga grupet hetimore në të gjithë vendin. Këto grupe, të përbëra nga prokurorë të SPAK-ut, hetues të Byrosë Kombëtare të Hetimit, agjentë financiarë dhe personel mbështetës, do të jenë në terren për të monitoruar dhe hetuar çdo tentativë për manipulim të procesit zgjedhor. Vigjilenca e SPAK-ut ndaj krimeve zgjedhore është rritur ndjeshëm, me synimin për të goditur fenomenet e blerjes së votave, presionet ndaj zgjedhësve dhe keqpërdorimin e burimeve shtetërore për qëllime elektorale. Strukturat e posaçme janë të angazhuara për të reaguar menjëherë ndaj çdo denoncimi dhe për të siguruar ndjekje penale për shkelësit e ligjit. Gjatë ceremonisë së dorëzimit të pajisjeve, ambasadori i OSBE-së në Shqipëri, Michel Tarran, vlerësoi përpjekjet e SPAK-ut për mbrojtjen e integritetit zgjedhor dhe theksoi rëndësinë e mekanizmave të fortë për një proces të drejtë dhe të ndershëm. “Sot nuk ka të bëjë vetëm me pajisjet – ka të bëjë me fuqizimin e institucioneve që kontribuojnë në forcimin e demokracisë në Shqipëri. Dua të përgëzoj SPAK-un për nismën dhe përkushtimin për të hetuar dhe ndjekur penalisht krimet zgjedhore. Shpresojmë që rritja e bashkërendimit dhe veprimit nga institucionet përgjegjëse do të shkurajojnë shkelësit e mundshëm të ligjit dhe jemi të bindur se puna juaj do të kontribuojë në sigurimin e zgjedhjeve pa ndërhyrje të paligjshme”, tha Tarran. Drejtuesi i SPAK-ut, Altin Dumani, shprehu mirënjohjen për mbështetjen dhe theksoi se zgjedhjet e lira dhe të ndershme janë thelbësore për demokracinë, ndërsa institucionet ligjzbatuese do të jenë të palëkundura në ndjekjen e çdo shkeljeje. “Zgjedhjet janë në themel të shtetit demokratik. Ne i shprehim mirënjohjen tonë OSBE-së për mbështetjen e vazhdueshme. Këto pajisje do të ndihmojnë në rritjen e kapaciteteve të prokurorëve të posaçëm dhe hetuesve në evidentimin në kohë dhe ndjekjen efektive të krimeve zgjedhore”, tha Dumani. Ky donacion u bë i mundur në kuadër të projektit të Prezencës së OSBE-së “Mbështetje për reformën dhe proceset zgjedhore në Shqipëri”, financuar nga Suedia, Zvicra, Misioni i SHBA-së në OSBE dhe Polonia. OSBE vijon të mbështesë institucionet shqiptare në forcimin e transparencës dhe besueshmërisë së procesit zgjedhor.
Task-Forcë në 12 qarqe
Ka qenë vet Prokuroria e Posaçme që ka zbardhur planin e masave dhe strategjinë për goditjen e krimit elektoral para dhe gjatë zgjedhjeve parlamentare të 11 Majit. Detaje të planit; nga grupet hetimore që do ngrihen nga SPAK-u dhe që do veprojnë në terren në të 12 qarqet e vendit dhe 61 bashkitë, mbledhja e informacionit dhe denoncimeve, procesi i verifikimit dhe deri tek investigimi i aktivitetit financiar të personave të dyshuar apo partive politike gjatë fushatës dhe ditës së zgjedhjeve. SPAK lajmëroi me anë të një njoftimi publik edhe 4 veprat penale që rrezikojnë kundravajtësit, të parashikuara në ligj.
