Donald Trump ka risjellë propozimin e tij për të bërë të përhershme kohën e kursimit të ditës, duke sugjeruar që të shtohet një orë ekstra dritë gjatë muajve të dimrit, nga nëntori deri në mars. Ai bëri këtë thirrje përmes platformës Truth Social, duke e quajtur këtë një ide shumë të popullarizuar që do të shmangte shqetësimin e ndryshimit të orëve, një proces që ai e cilësoi si “shumë të kushtueshëm dhe një shqetësim i madh për qeverinë tonë”.
Trump ka mbështetur këtë propozim edhe vitin e kaluar, por muajin e kaluar ai shfaqi disa rezerva për shqetësimet që kishin ngritur shtetet veriore të SHBA-së, të cilat ishin të shqetësuara se fëmijët mund të shkonin në shkollë në errësirë gjatë muajve të dimrit.
Në një takim në Zyrën Ovale, Trump pranoi se ky propozim kishte ndarë opinionin publik: “Pjesa më e madhe e njerëzve dëshirojnë më shumë dritë në orët e vona të pasdites, por ka edhe nga ata që preferojnë më shumë dritë në mëngjes për t’i dërguar fëmijët e tyre në shkollë në dritë,” tha ai.
Diskutimi për këtë çështje u intensifikua më shumë në vitin 2022, kur Senati miratoi një projekt-ligj për këtë ndryshim, të paraqitur nga senatori i atëhershëm Marco Rubio, i cili tani është Sekretar i Shtetit. Megjithatë, propozimi u bllokua në Dhomën e Përfaqësuesve dhe nuk u avancua më tej.
