Nuk dihet ende se çfarë e shkaktoi aksidentin e helikopterit në Nju Jork që la të vdekur gjashtë persona. Por ka të dhëna që flasin për një defekt teknik.
Sipas Michael Roth, pronari i ‘New York Helicopter’ – kompania që organizoi fluturimin turistik – helikopterit i mbaroi karburanti vetëm disa minuta pasi nisi fluturimin.
Ai përshkroi kontaktin e fundit me pilotin e tij.
“Ai [piloti] njoftoi me radio se duhej të ulej dhe se kishte nevojë për karburant, dhe se i duheshin rreth tre minuta që të mbërrinte – por 20 minuta më vonë, ai nuk kishte mbërritur ende”.
Roth nuk tha se pse helikopteri mund të ketë mbetur pa karburant.
Tragjedia ndodhi rreth orës 15:15 të enjten në anën e Nju Xhersit të lumit Hudson, jo shumë larg anës jugore të Manhatanit. Për arsye ende të panjohura, helikopteri u copëtua në ajër dhe u rrëzua me kokë në lumë.
“Ne jemi të gjithë të shkatërruar. Çdo punonjës në kompaninë tonë është i tronditur. Gruaja ime nuk ndalon së qari. Vdekja e një fëmije është një katastrofë monumentale për çdo person,” tha Roth.
Viktimat janë familja e Agustin Escobar nga Spanja. Escobar është president i korporatës globale gjermane Siemens në Spanjë që nga viti 2022. Emri i pilotit ende nuk është bërë i ditur zyrtarisht.
Në momentin e përplasjes kishte vranësira dhe erërat me shpejtësi nga 15 dhe 25 kilometra në orë dhe shtrëngatë deri në 35 kilometra në orë./ S,M
