Rrëzimi i një helikopteri turistik në lumin Hudson të Nju Jorkut të enjten pasdite, i cili vrau një pilot dhe një familje prej pesë anëtarësh nga Spanja, ishte “plotësisht i parashikueshëm”, thonë ekspertët.
“Shumë nga këta helikopterë janë 30 ose 40 vjeç,” tha Andrew Rosenthal, president i grupit Stop the Chop, i cili ka nisur një fushatë për t’i dhënë fund fluturimeve me helikopterë turistikë mbi qytetin e Nju Jorkut dhe zonën metropolitane Nju Jork-Nju Xhersi.
Helikopteri që u rrëzua ishte 21 vjeçar dhe “ishte mjaft i vjetër”, shtoi ai.
Madje, ai vuri në dukje kontradiktën me taksistët të cilëve u kërkohet të marrin një makinë të re çdo pesë deri në tetë vjet, por “ne i lëmë këto gjëra të fluturojnë në qiell për 30 dhe 40 vjet”.
Të paktën 38 persona kanë vdekur në aksidente me helikopterë në Nju Jork që nga viti 1977.
Në vitin 2009, një aeroplan dhe një helikopter turistik u përplasën mbi lumin Hudson, duke vrarë nëntë persona, ndërsa pesë të tjerë vdiqën në 2018 kur një helikopter u rrëzua në lumin Lindor. Kanë ndodhur edhe aksidente të shumta, siç thotë grupi Stop the Chop.
Me të gjitha rreziqet e tij, është gjithashtu një aktivitet fitimprurës për qytetin, pasi turnetë gjenerojnë një total prej 2.7 milion dollarë çdo vit në Nju Jork në qira nga kompanitë që bëjnë më shumë se 42,000 udhëtime turistike në vit. Nuk dihen shkaqet e rrëzimit që zhduku familjen e kreut të Siemens në Spanjë, por dëshmitarët okularë raportuan se kishin parë helikopterin të shpërbëhej në ajër dhe të rrëzohej në lumë./E.S
