Zbulime tronditëse po bëhen nga ish të burgosur dhe dezertorë të rangut të lartë nga Koreja e Veriut, duke denoncuar një rrjet sistematik eksperimentesh njerëzore mbi të burgosurit politikë, fëmijët, personat me aftësi të kufizuara dhe gratë.
Sipas mediave të huaja, përshkrimet janë të tmerrshme dhe prekin funksionin e kampeve të përqendrimit jo thjesht si qendra torture, por si laboratorë vdekjeje.
Kwon Hyuk, ish-drejtor sigurie në kampin famëkeq 22, në dëshminë e BBC-së në vitin 2004, përshkroi pa hezitim vrasjen e një familjeje të tërë nga gazi brenda një dhome eksperimenti. “Prindërit po përpiqeshin t’i mbanin fëmijët gjallë deri në frymën e fundit”, tha ai, duke treguar tmerrin e procesit.
Sun Ok-li, një ish e burgosur shtatë-vjeçare në kampin Kaechon, tregon se si iu kërkua të shpërndante lakër të njomur me helm për 50 të burgosura femra. Brenda pak minutash, ato të gjitha vuajtën nga të vjella të pakontrollueshme gjaku dhe vdiqën, me gjasë si pjesë e një eksperimenti biologjik. Siç tha ajo: “Çuditem se si është e mundur që një person të vrasë një person tjetër kështu”.
Përshkrimet e këtyre dëshmive konfirmohen nga dezertorë të tjerë, si Im Cheon-yong, një ish-pjesëtar i forcave speciale të vendit. Sipas tij, ushtria ka kryer eksperimente me armë biologjike dhe kimike, fillimisht te minjtë dhe më pas te njerëzit, për të trajnuar oficerët se si të vrasin me këto substanca. Ai vetë iku në Perëndim kur pa fëmijët me aftësi të kufizuara duke u përdorur si kafshë eksperimentale.
Një tjetër element rrëqethës është referenca për blerjen e fëmijëve me aftësi të kufizuara nga familjet e tyre, me qëllim përdorimin e tyre në eksperimente. Nëse prindërit refuzonin, ata kërcënoheshin me burgim në kampe.
Siç raporton Daily Mail, rrjeti i sëmurë duket se mbështetet nga vetë regjimi. Sipas pretendimeve, edhe zyrtarë të rangut të lartë në Ministrinë e Sigurisë Publike të Koresë së Veriut po shantazhonin familjet për të dorëzuar të afërmit e tyre si subjekte të mundshme testimi. Tregime të tjera përshkruajnë histerektomi të detyruara tek gratë me xhuxh, ndërsa foshnjat e lindura brenda kampeve ekzekutohen në vend nga rojet.
Megjithëse Pheniani i karakterizon këto zbulime si “të pakuptimta” dhe “propagandë”, bollëku i dëshmive dhe provave të regjistruara i shton më shumë peshë misterit. Që në vitin 2023, Ministria e Bashkimit të Koresë së Jugut mblodhi më shumë se 500 dëshmi të dezertorëve, duke dokumentuar në një raport prej 450 faqesh mizoritë që supozohet se janë kryer nga regjimi i Kim Jong-un.
Dhjetra organizata po bëjnë thirrje për inspektorë të pavarur për të hetuar kampet e Koresë së Veriut, por regjimi mohon kategorikisht çdo akses, shkruan A2 CNN.
Siç raporton studiuesja e BBC-së, Olenka Frenkiel: “E vërteta për atë që po ndodh pas kufijve të Koresë së Veriut mund të jetë më e errët se sa mund ta mbajë ndërgjegjja jonë. Por ne duhet ta njohim atë.”/e.t
