Lufta në Lindjen e Mesme ka hyrë në ditën e 557 me tensione që nuk njohin ulje. Hamasi ka refuzuar zyrtarisht propozimin e fundit të Izraelit për një armëpushim 6-javor dhe shkëmbim pengjesh, duke hedhur në erë shpresat për një ndërprerje të përkohshme të gjakderdhjes në Gaza. Sipas grupit palestinez, propozimi ishte “i papranueshëm” dhe nuk garantonte asnjë tërheqje reale të ushtrisë izraelite nga territori i pushtuar.
Në një deklaratë shqetësuese, Hamasi njoftoi gjithashtu se ka humbur kontaktin me njësinë që mban pengun izraelito-amerikan Idan Alexander, duke ngritur frikën se ai mund të jetë vrarë ose të jetë zhvendosur në zona të panjohura brenda rrënojave të Gazës.
Ndërkohë, një sulm ajror izraelit goditi hyrjen veriore të një spitali fushor në Rripin e Gazës, duke shkaktuar panik mes pacientëve dhe personelit mjekësor. Ushtria izraelite pretendon se në zonën përreth fshiheshin militantë të Hamasit, por pamjet dhe dëshmitarët në terren flasin për të plagosur dhe trupa të pajetë të civilëve.
Raportet e fundit tregojnë për një përkeqësim dramatik të situatës humanitare. Spitalet janë jashtë funksionit, furnizimet me ilaçe janë drejt zeros dhe mbi 30 mijë civilë kanë braktisur lagjet e tyre vetëm në 48 orët e fundit.
Ndërkohë, lideri suprem i Iranit, Ayatollah Ali Khamenei, ka bërë një postim të drejtpërdrejt dhe të rrezikshëm, duke thënë se “Izraeli duhet të shkatërrohet”, në një kohë kur bisedimet me ndërmjetësimin amerikan janë ende në zhvillim.
Kryeministri izraelit Benjamin Netanyahu, në një deklaratë të tensionuar, reagoi me fjalë të forta:“Ne nuk kemi luksin të zgjedhim. Po luftojmë për ekzistencën tonë. Po luftojmë për të ardhmen tonë.”/E.S
