Presidenti i Shteteve të Bashkuara, Donald Trump, ka lëshuar një tjetër sulm të ashpër ndaj Universitetit të Harvardit, duke e cilësuar atë si një institucion që “nuk është më i denjë për të qenë në listën e universiteteve të mëdha” dhe që nuk duhet të përfitojë më nga fondet federale.
Në një postim në platformën e tij “Truth Social”, Trump akuzoi universitetin prestigjioz për “humbje drejtimi” dhe rekrutimin e figurave që sipas tij, janë të paafta dhe përfaqësojnë dështimin.
Ai përmendi në mënyrë specifike dy ish-kryebashkiakë, një nga Nju Jorku dhe tjetri nga Çikago – duke i cilësuar si “dy nga më të këqijtë dhe më të paaftët në historinë e Amerikës” – të cilët tani japin mësim në Harvard.
“Këta individë të majtë radikalë nuk dinë tjetër veçse të promovojnë dështimin. Ata kanë dëmtuar qytetet e tyre në mënyrë të pariparueshme dhe tani gjoja po edukojnë liderët e ardhshëm”, shkroi Trump, duke shtuar se universiteti është mbushur me “idiotë me mendësi të Majtë”, që nuk u mësojnë studentëve gjë tjetër veç mediokritetit.
Në përmbyllje, Trump tha se Harvardi nuk përfaqëson më cilësi akademike dhe nuk meriton të konsiderohet ndër institucionet më të mira arsimore në botë./E.S
