Zbardhen detaje të reja nga incidenti që ndodhi mbrëmë në Fier ku u shoqëruan disa njerëz të shtabit të Agron Kapllanajt.
Policia njoftoi se shërbimet e Drejtorisë së Forcës së Posaçme Operacionale në Departamentin e Policisë Kriminale në Policinë e Shtetit, së bashku me hetuesit e BKH-së pasditen e djeshme ishin me shërbim në qarkun e Fierit.
Rreth orës 19:20, të mbrëmjes në aksin rrugor Fier – Patos, po sipas policisë shërbimet operacionale të Policisë dhe hetuesit e BKH-së janë goditur për shkak të detyrës nga disa persona, të cilët janë identifikuar dhe shoqëruar në Drejtorinë Vendore të Policisë Fier për veprimeve të mëtejshme.
Ish-kryebashkiaku i Mallakastrës, Kapllanaj ka pohuar se në parkimin e zyrave të subjektit politik që ai përfaqëson, Djathtas 1912 ka shkuar një mjet i pa loguar rreth orës 18:00 dhe prej andej ka ngritur një dron. Ky veprim sipas tij është kryer dhe në një kohë të dytë dhe ka ngjallur dyshime të zyrtarëve që ishin brenda godinës.
“Kur ka shkuar roja i objektit për të kërkuar shpjegime se përse po ngrenë dronin nga parkimi i zyrave të tyre një prej agjentëve i ka thënë se ‘po kërkojnë të blejnë një pronë’, ndërsa më pas e ka ofenduar me fjalë të rënda”, tha Kapllanaj./e.t
