Një pamje e pazakontë ka habitur pushuesit në Beverly Beach, në bregun lindor të Floridës, kur një anije 15 metra e gjatë u shfaq papritur në breg, pa asnjë person në bord.
Anija, e quajtur Miss Montie, u pa të dielën në mbrëmje, duke dalë në breg si një anije fantazmë. Shërbimi zjarrfikës i Flagler Beach mbërriti menjëherë dhe konfirmoi se anija ishte bosh dhe nuk kishte asnjë gjurmë të ekuipazhit.
Misteri u zgjidh më vonë, kur doli se gjithçka kishte ndodhur pas një ndërhyrjeje të Rojes Bregdetare. Kapiteni Corey Thomas, pronari i anijes, tregoi se ishte detyruar ta braktiste atë të premten në mbrëmje pasi motori dështoi dhe spiranca ngeci. Përpjekjet për ndihmë nga një tjetër anije dështuan, dhe më në fund ai kërkoi ndihmën e Rojes Bregdetare.
“Rojtaret më thanë se nuk mund të më tërhiqnin sepse ishte shumë e rrezikshme,” tregoi Thomas për Daytona Beach News-Journal. Ai, qeni i tij Lucy dhe një anëtar tjetër i ekuipazhit u shpëtuan me sukses, pa lëndime.
Pas përpjekjeve të dështuara për ta rimarrë anijen në detin e trazuar, Miss Montie përfundoi sërish e braktisur. Fatmirësisht, ajo doli në breg pa dëmtime të mëdha.
Pamja e saj tërhoqi shumë vizitorë, që bënë foto dhe shprehën habinë e tyre. Ndërkohë, kapiteni Thomas ka hapur një GoFundMe për të mbledhur $11,000 për riparimet dhe heqjen e anijes. /E.T
