Sali Berisha bën përgjegjës Kryeministrin Rama për situatën e rendit në vend, duke sjellë si shembull dy ngjarjet mafioze, atë në Lezhë e Tiranë.
“Mbrëmë rrugët e Tiranës u skuqën, 4 vetë morën breshëri dhe deri tani narkoshteti nuk është në gjendje të thotë se çfarë ishin ato, por kurrë nuk mund të gjuhej mbi një 11-vjeçar. Mirëpo njeriu që i ndërsen dhe u thotë hani kokën njëri-tjetrit, por më shërbeni mua, krijon këtë situatë”.
Nga Kruja ku u takua me bizneset në tregun artizanal të këtij qyteti, Berisha ftoi qytetarët që të denoncojnë çdo person që tenton të bëjë presion mbi votën e tyre.
“Çdo qytetar të mbajë shënim personin që ju bën presion për votën, do të shpallet e trajtohet si terrorist”.
Pas gjuhës së zbutur të Kryeministrit ndaj kreut të SPAK, kryedemokrati tha se fshihet nisja e hetimeve ndaj Edi Ramës për tokën e marrë në kundërshtim me ligjin, ku ka ndërtuar banesën e tij në Surrel.
“Një gjykatës guximtar e urdhëroi SPAK-un ta hetojë, dy ditë më parë, në skap janë bërë mbledhje emergjente sikur ra bomba dhe ky dilte pasdite e thoshte burrë më të mirë se Altin Dumani s’ka. O Edvin, dosja është aty, që nga djegësi, vjedhjet e BE për fermerët, që biletet 30 mijë Euro për ndeshje futbolli, do të të ndjekin për jetë”.
Në pazarin e Krujës ku artizanët e veshën me jelek e qeleshe, Berisha u zotua t’i japë zgjidhje ndotjes së ambientit nga fabrikat e çimentos që sipas tij kanë rritur edhe rastet me sëmundje kancerogjene në këtë zonë.
“Kjo qeveri sheh si të pasurohen ministrat dhe të plaçkisin, sepse atyre nëse u imponon filtra ata mjedisin nuk e mbysin, dhe kjo merr fund, dhe merr fund edhe mungesa e ilaçeve”.
Brenda 100 ditëve të para të qeverisë së tij, premtoi jo vetëm aministi fiskale për biznesin e vogël, por edhe lehtësi fiskale për ta.
“Bashkia mos vendosë më shumë së 1% të xhiros mbi taksat, tatim-fitimi 180 mijë Euro xhiroja, po kështu edhe për tvsh mbi 180 mijë Euro. Energjinë 6 Lekë, ujin e përgjysmojmë, pension minimal 200 Euro, rrisim pagat e pensionet”.
Ajo që e surprizoi nuk ishte vetëm xhubleta e qeleshja, por edhe bufi që i dhuruan.
“Aaaa, simboli i mençurisë. E çmendi Edi Ramën”.
Ndërsa gjatë takimit në një fasoneri, Berisha u zotua t’i japë fund hemorragjisë së Euros.
“Pas datës 12 Maj do të krijojmë një bord që do t’u kompensojë eksportuesve qindarkë për qindarkë zhvlerësimin e Euros, qindra ndërmarrje eksporti falimentuan sepse ra Euro 35%”.
Kryedemokrati premtoi se të gjithë ata qeveritarë e zyrtarë që kanë abuzuar me paratë e taksapaguesve shqiptarë do të përballen me ligjin dhe pasuritë do t’u konfiskohen./E.S
