Ish- kryeministri Sali Berisha dhe shefi i opozitës së bashkuar e ka braktisur zyrën, duke u marrë me maksimizimin e votave në terren. Berisha ja ka lënë Flamur Nokës, sekretarit të Përghithshëm në PD për tu koordinuar me aleatët në tre javët e fundit të fushatës elektorale. Noka ju ka kërkuar aleatëve që të forcojnë komunikimin me selitë në diasporë.
Sali Berisha po intensifikon angazhimin e tij në terren në kuadër të fushatës për zgjedhjet e 11 majit, duke shfaqur gjithnjë e më shumë një prani direkte në komunikim me qytetarët dhe strukturat.
Ndërkohë që ai vetë fokusohet te përballja me publikun dhe prezantimi i vizionit të tij përmes “Aleancës për Shqipërinë Madhështore”, koordinimi dhe bashkërendimin me partitë aleate i është besuar Sekretarit të Përgjithshëm të Partisë Demokratike, Flamur Noka. Burime pranë PD-së bëjnë të ditur se Noka ka mbajtur një takim pune me përfaqësues të aleatëve politikë të opozitës, ku në qendër të diskutimit ka qenë dinamika e fushatës dhe përgatitjet organizative në çdo qark të vendit.
Noka, i cili mban një rol kyç në funksionimin strategjik të fushatës, ka nënvizuar se efektet e para të daljes së Berishës në terren janë ndjerë menjëherë dhe kanë gjallëruar strukturat, duke gjeneruar një frymë mobilizuese në bazë. “Fryma që ka sjellë zbritja e liderit në terren dhe prezantimi i programit tonë është ajo që na forcon dhe na jep energji. Mesazhi i Berishës ka qenë i qartë: kjo është një betejë për rikthimin e shpresës dhe të drejtës në Shqipëri, ndaj duhet ta përçojmë me forcë dhe koordinim në çdo cep të vendit”, mësohet të ketë thënë Noka gjatë takimit.
Sipas Partisë Demokratike, qëllimi i takimit me aleatët ka qenë edhe përmirësimi i bashkëpunimit në terren, rritja e efikasitetit në përdorimin e rrjeteve sociale si mjet komunikimi me publikun, dhe përfshirja aktive e diasporës shqiptare në këtë proces. Në fokus të diskutimit ishte edhe krijimi i një fronti të përbashkët në median sociale, duke pasur parasysh rëndësinë që ka ky kanal komunikimi në transmetimin e mesazhit politik, sidomos në një kontekst ku televizionet tradicionale konsiderohen shpesh të filtruar ose të anshëm.
Në këtë kuadër, Noka ka kërkuar angazhim më të madh nga strukturat e partive aleate në ndarjen dhe promovimin e përmbajtjeve, duke e cilësuar median sociale si mjetin më të drejtpërdrejtë për të tejçuar të vërtetat e opozitës. Një tjetër element i rëndësishëm i strategjisë që u diskutua në takim ishte aktivizimi i degëve të partive opozitare në diasporë. Sipas PD, përfshirja e shqiptarëve që jetojnë jashtë vendit është një nga synimet kryesore të kësaj fushate, duke e konsideruar votën e diasporës jo vetëm si një aset numerik, por edhe si një instrument presioni për ndryshim dhe llogaridhënie.
Fushata e opozitës është intensifikuar ndjeshëm në ditët e fundit, me Berishën që po zhvillon takime të drejtpërdrejta me qytetarët dhe me Flamur Nokën që përkujdeset për koordinimin e operacionit politik në prapaskenë. Partia Demokratike dhe aleatët e saj janë pozicionuar për të sfiduar mazhorancën me një mesazh të qartë politik: Shqipëria ka nevojë për një ndryshim të thellë dhe për rikthimin e politikës që i shërben qytetarëve. Dhe në këtë sfidë, duket se koordinimi mes terrenit dhe strategjisë mediatike është kthyer në prioritet, me Flamur Nokën që mban në dorë fijet e këtij mekanizmi të ndërlikuar fushate.
