Kryeministri Edi Rama u shpreh se qytetarët shqiptarë më 11 maj duhet të votojnë PS për Shqipërinë 2030 në BE. Në takimin e zhvilluar në Maliq këtë të shtunë, kryesocialisti Rama theksoi se në 11 maj me votën e tyre, prindërit investojnë që fëmijët dhe shqiptarët të kenë pasaportën europiane të Shqipërisë.
“Zgjedhja e 11 majit nuk është një zgjedhje mes PS dhe kënetës. Edhe pse është çmenduri që mund të shkosh me kënetën. Qëllimi kënetës nuk ka lidhje me qëllimin e madh të përbashkët të popullit. Zgjedhja është midis së mirës së madhe të përbashkët të gjithë kombit dhe interesit të një familje të vetme. Zgjedhja është midis Shqipërisë 2030 dhe BE dhe kënetës dhe bufit të saj për ta kthyer Shqipërinë drejt e në gropë. Si mund ta diskutojnë prindërit demokratë se çfarë duhet të votojnë në 11 maj. Në 11 maj me votën e tyre investojnë që fëmijët të kenë pasaportën europiane të Shqipërisë”, tha Rama.
Gjithashtu drejtuar të rinjve, Rama u shpreh se padyshim në zgjedhjet e 11 majit duhet të votojnë për Shqipërinë në BE.
“Si mund të shkohet në kënetë. Me tregonin në video, një deputet i kënetës, një Fidel Fidel…Hajde muhabet hajde. Hajde çyryk hajde. Po kur thonë Edi Rama ofendon burrat se i quan çyryk. Unë them se PS nuk mundet dot, sepse e mbështesin 56 % e vajzave dhe grave të Shqipërisë. Burrat gjysmën e trurit e kanë me ujë, me ujë kënete…. Gratë kanë mision të madh dhe nëse Shqipëria është afër BE, arsyeja kryesore është se kjo forcë politike mbështetjen e kanë tek gratë…Në listën e mbyllur 52 % ne i kemi gra…Më 11 maj në BE, jo në kënetë. Përtej dallimeve, të majtë e të djathtë, rruga jonë është në BE që të bëhemi më në fund të barabartë”, tha Rama./ S,M
