Ndonëse është ende në fazë rikuperimi Papa Françesku u shfaq në ballkonin e Bazilikës së Shën Pjetrit për t’i uruar besimtarët për festën e Pashkëve.
Mesazhin e së dielës të Papa Franceskut e lexoi një ndihmës I tij për shkak të kushteve shëndetësore .Pasi bekoi të pranishmit Ati I Shenjtë përsëriti thirrjen e tij për një armëpushim në Gaza dhe dënoi konfliktin.
“Mendoj për popullin e Gazës dhe komunitetin e saj të krishterë në veçanti, ku konflikti i tmerrshëm vazhdon të shkaktojë vdekje dhe shkatërrim dhe të krijojë një situatë dramatike dhe të mjerueshme humanitare.”
Në mesazhin e tij Papa Françesku shprehu shpresën se në Ukrainë do të mbizotërojë një paqe e drejtë dhe e qëndrueshme, si dhe stabiliteti në Liban dhe Siri. Për Ballkanin Perëndimor, Papa Françesku u lut që drita e Pashkëve të frymëzojë liderët të qetësojnë tensionet dhe të refuzojnë veprimet destabilizuese, duke zgjedhur në vend të kësaj një rrugë harmonie, së bashku me fqinjët e tyre.
Ati i Shenjtë foli edhe për lirinë e fesë dhe respektimin e pikëpamjeve të të tjerëve, duke theksuar se paqja nuk është e mundur pa to.
Këtë vit, festa e Pashkëve ka edhe më shumë rëndësi sepse Kisha Katolike e ka shpallur vitin 2025 një vit jubilar apo të shenjtë.
Vetëm këtë fundjavë, rreth 1 milion vizitorë janë në qytet, duke përfshirë besimtarë nga e gjithë bota. Midis tyre është edhe zëvendëspresidenti i SHBA, JD Vance i cili takua shkurtimisht me Atin e Shenjtë për të shkëmbyer urimet për festën e Pashkëve./E.S
