Igli Tare te Milani, thuajse e kryer. Ish-sulmuesi i kombëtares shqiptare ka disa muaj që përflitet si drejtori sportiv i ardhshëm i skuadrës italiane dhe duket se po ndodh.
Drejtuesit e “Djallit” dhe Tare do të takohen për herë të katërt për të diskutuar detajet e fundit të kontratës. Tare ka disa javë që pret një konfirmim final nga drejtuesit kuqezi.
Tare tashmë nuk ka rivalë të tjerë në këtë maratonë takimesh. Ai shihet si një kandidat bindës në Milano, sidomos pas punës spektakolare që ka bërë më parë te Lazio.
Milani po tenton të gjejë njeriun ideal për të bashkëpunuar me administratorin Giorgio Furlani dhe ai do të jetë Igli Tare. Detajet do të vendosen këtë fundjavë. Pritet që zyrtarizimi i kësaj goditjeje të madhe të ndodhë në mesin e javës së ardhshme.
Zlatan Ibrahimovic është njeriu më pozitiv në Milano për Taren. Suedezi e pëlqen shumë ish-sulmuesin e kombëtares shqiptare dhe i ka kërkuar Milanit të mos hezitojë për të.
