Kreu i PD, Sali Berisha, nga njësia 4 në Tiranë, ku prezantoi programin e PD, tha se do të bëjë gjithçka që të kthejë të rinjtë e larguar nga vendi. Ai tha se për ta do të ketë lehtësira dhe subvencione.
“Nuk kemi ne të ardhme çfarë do që të bëjmë, nëse të rinjtë nuk qëndrojnë në këtë vend dhe nuk vendosin të ndërtojnë ëndrrën e tyre në këtë vend. Dhe përpjekja jonë do të jetë titanike që çdo i ri të ketë shansin të mbarojë shkollën e lartë”.
“Asnjë mesatare nuk do të ketë për shkollim. Qeveria do paguajë 1 vit sigurime shoqërore për çdo të ri të punësuar. Do paguajë të gjitha shpenzimet për trajnimin e tyre. Çdo çift i ri do të ketë një grant 30 mijë euro për të patuar çatinë mbi kokë, për të paguar interesat e kredisë”.
“Do bëjmë gjithçka që këta qindra-mijëra të rinj që na ikën, 600 mijë kanë ikur në 10 vitet e fundit, të kthehen 5 vite pa asnjë taksë. Kredi të buta për strehim. Do bëjmë gjithçka të kthejmë kombin në moshën e rinisë. Vetëm një komb që ruan dhe jeton në moshën e rinisë së tij, është komb me të ardhme. Për fat të keq këto 12 vite shqiptarët humbën me shpejtësi të rrufeshme moshën e tyre të rinisë. Por unë kam besim të madh tek Zoti, kam besim të madh tek qytetarët shqiptarë që ne do rikthejmë përsëri dhe do vendosim këtë komb në moshën e rinisë së tij”, tha ai. m.p.
