Një sherr mes kushërinjve ka përfunduar në dhunë fizike me sende të forta në fshatin Cakran të Fierit.
Ngjarja ka ndodhur mbrëmjen e djeshme, ku 37-vjeçari Miri Sulaj, në bashkëpunim me djalin e tij, kanë dhunuar rëndë 44-vjeçarin Eduard Sulaj, i cili është djali i xhaxhait të 37-vjeçarit.
Eduard Sulaj ka pësuar lëndime të shumta në pjesë të ndryshme të trupit dhe fillimisht është dërguar për ndihmë mjekësore në Qendrën Shëndetësore të Cakranit.
Për shkak të plagëve të rënda dhe gjendjes së përkeqësuar shëndetësore, ai është transportuar menjëherë në Spitalin Rajonal të Fierit për trajtim të specializuar dhe ndodhet nën kujdesin e mjekëve.
Pas incidentit, babë e bir janë larguar nga vendngjarja, por janë lokalizuar dhe arrestuar disa orë më vonë nga efektivët e Policisë së Fierit në bashkëpunim me Forcat “Shqiponja”./E.S
