Një ndërprerje totale e energjisë elektrike në Spanjë ka krijuar kaos dhe frikë në këtë vend.
Përveç trafikut në trena dhe automjete, shumë kompani kanë vendosur të ndërpresin aktivitetin e tyre dhe kanë dërguar punonjësit në shtëpi, për shkak të pamundësisë për të vazhduar ditën e tyre të punës. Por jo vetëm kaq, sepse më e keqja kanë qenë plaçkitjet, kryesisht në supermarkete dhe bizneset me hapësira dhe frekuentim të madh. Vjedhje masive në supermarkete dhe disa dyqane u raportuan, si pasojë e errësirës dhe kaosit të krijuar.
“Disa dyqane luksoze në qendër të Madridit mbyllën dyert e tyre nga frika e vjedhjes dhe plaçkitjes. Megjithatë, ata që kanë mbetur të hapur duket se vuajtën nga vjedhjet dhe plaçkitjet”, raporton media spanjolle “Marca”.
Shërbimi 112 në komunitete autonome si Madridi dhe Castilla León, ndër të tjera, këshillon që 112 duhet të përdoret vetëm për thirrje urgjente.
Kompanitë e energjisë elektrike ende nuk kanë dhënë asnjë deklaratë në lidhje me ngjarjen, por po hetojnë shkaqet e ndërprerjes, mes tyre si pistë kryesore mbetet hakimi kibernetik. Ndërprerjet shtrihen në Portugali, Francë, të gjithë Spanjën, Andorrën dhe disa vende të tjera të botës./E.S
