Ambasada e Republikës së Shqipërisë në Austri ka nisur përgatitjen për aktivitetin e rëndësishëm që do të zhvillojë në bashkëpunim me Muzeun e Historisë së Natyrës në Vjenë. Ky muze është më prestigjiozi i Europës Qendrore. Aktiviteti do të organizohet më 13 maj 2025 në Vjenë.
Për këtë rast, ambasadori i Republikës së Shqipërisë në Austri, Fatmir Velaj, zhvilloi një takim me Prof. Dr. Skënder Gjinushin, Kryetarin e Akademisë së Shkencave të Shqipërisë.
Ky aktivitet, me një rëndësi të veçantë historike dhe shkencore, përfaqëson një moment krenarie kombëtare, pasi për herë të parë do të prezantohet para komunitetit shkencor austriak dhe studiuesve të tjerë ndërkombëtarë një zbulim unik të arkeologjisë shqiptare: “Kalorësi i Babunjës”.
Ambasada e Republikës së Shqipërisë në Austri mbetet e angazhuar për të promovuar vlerat kombëtare dhe për të thelluar marrëdhëniet akademike dhe kulturore me partnerët austriakë dhe më gjerë./E.T
