Aktivistja shqiptaro-amerikane, Evi Kokalari ka reaguar sërish për kontratën e lobimit të PD në SHBA, me një shifër marramendëse prej 6 milionë dollarë të cilat duhet t’ia paguajnë kompanisë së njerëzve të afërt të Trump për një periudhë dy vjeçare. Në një postim të radhës në rrjetin e saj social Facebook, Kokalari ironizon duke thënë se firmosja e kësaj kontrate tregon se sa të korruptuar janë, pasi një shifër kaq të kamur, plot 6 milionë dollarë, nuk do ta paguanin as oligarkët rusë për ‘heqjen e njollave’, referuar këtu non gratës së Berishës.
Kokalari nënvizon se Trump në asnjë rast nuk do të marrë para dhe as nuk i intereson paraja e tyre. Kokalari shkruan se PD, thjesht ka blerë disa konsulentë që po mundohen të bëjnë para në emër të Trump, por nuk e kanë afruar PD me administratën e tij.
“Më duhet t’iu shpjegoj diçka për situatën absurde që shohim me PD në këto ditë. Në radhë të parë, me lejoni t’iu them se non-grata e Berishës mund të ishte hequr pa paguar asnjë dollar, dhe nga individë që mund ta bënin këtë për arsye të tjera si psh ndihmë opozitës etj. Fakti që këta kanë paguar disa si LaCivita & Trujillo $6 millionë nuk e ka bërë Amerikën me ta, siç thotë Flamur Noka lart dhe poshtë, por ka blerë disa konsulentë që po mundohen të bëjnë para në emër të Trumpit.
Trump as do marrë para as nuk i intereson paraja e këtyre. E njëjta gjë shkon dhe me Rubion, prandaj them, shanset do ishin më të larta për t’ia hequr njollën Berishës nëse dikush do kishte lobuar me shpirt dhe do dinte si ta parashtronte ketë çështje në institucionet e duhura. Firmosja e kontratës tregon thjeshtë që në atë Shqipëri të vogël dhe të varfër këta qenkan realisht të korruptuar, sepse as oligarkët rusë nuk paguajnë $6 milionë për heqje njollash”, shkruan Kokalari.
Një koment e ka edhe për përgënjeshtrimin që djali i Donald Trump dhe Richard Grenell bënë ndaj Partisë Demokratike, pas lajmit se Doanld Junior anuloi një takim me Ramën.
“Nga ana tjetër, fakti që mediat e drejtorit te komunikimit të PD-së publikojnë artikuj të mbushur me histori false dhe as nuk marrin mundimin t’i verifikojnë, sidomos kur flitet për djalin e Presidentit Trump shkon përtej tragjedisë. Është një gjë t’i sulmosh familjen e Trumpit me fakte, dhe është diçka tjetër ta bësh atë me informata të pavërteta, sidomos kur je i zhytur kokë dhe këmbë në llum.
Sërish – nëse Berisha do t’i kishte ndenjur besnik PD-së së rithemelimit, hapjes se partisë, meritokracisë, primareve të vërteta dhe jo të manipuluara, dhe nëse ato $6 milionë do t’i kishte hedhur në fushatë, shanset do të ishin që do të fitonte më 11 Maj dhe non-grata mund t’i hiqej pa paguar asnjë lek.
Ne këtë moment duket se do humbë $6 milionëshin, zgjedhjet dhe do t’i mbetet damka pafundësisht. Fatkeqësia në këtë rast nuk është Berisha dhe non-grata e tij, por baza e opozitës, që në ketë pikë s’ka si mos të jete e dërrmuar emocionalisht dhe financiarisht. Atyre Berisha i detyrohet borxhin më të madh”, shkruan Kokalari.
/E.T
