Një grua 42-vjeçare është arrestuar në flagrancë nga Policia e Beratit, pasi ka goditur me thikë bashkëjetuesen e ish-bashkëshortit të saj.
Ngjarja ka ndodhur në fshatin Kamçisht të Beratit.
Sipas informacioneve zyrtare, e arrestuara, shtetasja P. Sh., ka sulmuar fizikisht me mjet prerës 41-vjeçaren B. I., pas një konflikti të momentit. Viktima ka marrë plagë, por fatmirësisht nuk ndodhet në rrezik për jetën.
Burime nga policia bëjnë me dije se B. I. është nën hetim penal prej dy ditësh për veprën penale “Dhuna në familje”, pasi dyshohet se ka ushtruar dhunë ndaj djalit të bashkëjetuesit të saj, i cili është gjithashtu djali i shtetases P. Sh.
Ndaj 42-vjeçares rëndon akuza për “Plagosje e rëndë me dashje”. Materialet i kaluan Prokurorisë së Rrethit Gjyqësor Berat për veprime të mëtejshme hetimore. m.p.
