Julen Lopetegui është emëruar trajner i ri i kombëtares së Katarit, duke nënshkruar një kontratë dyvjeçare, konfirmoi të enjten Federata e Futbollit të Katarit.
Emërimi i tij shënon rikthimin në skenën ndërkombëtare për trajnerin spanjoll, i cili do të drejtojë ekipin në ndeshjet e mbetura të kualifikueseve për Kupën e Botës 2026.
Në një video të postuar në rrjetin social X, federata e prezantoi trajnerin e ri me mesazhin: “Julen Lopetegui, trajneri i ardhshëm i ekipit kombëtar.” Ai do të zëvendësojë bashkatdhetarin Luis Garcia, i cili mori drejtimin e ekipit në dhjetor të vitit të kaluar, përpara Kupës së Gjirit.
Lopetegui, 58 vjeç, ka një karrierë të pasur si trajner, duke drejtuar më parë Spanjën, Real Madridin, Sevillan dhe së fundmi West Ham United. Me Spanjën ai ishte i pamposhtur në 20 ndeshje, por u shkarkua vetëm disa ditë para fillimit të Kupës së Botës 2018, pasi Real Madrid shpalli emërimin e tij si trajner.
Pas një periudhe të shkurtër dhe të pasuksesshme te West Ham, nga ku u largua në janar pas vetëm gjashtë muajsh, Lopetegui rikthehet sërish në stolin e një kombëtareje, këtë herë në një mision të vështirë me Katarin.
Aktualisht, Katari renditet i katërti në Grupin A të raundit të tretë të kualifikueseve të Azisë për Kupën e Botës 2026. Ata nuk mund të sigurojnë më një nga dy vendet e para që japin kualifikim direkt, por janë ende në garë për një vend në fazën e play-offit aziatik.
Katari ka grumbulluar 10 pikë nga tetë ndeshje, katër më shumë se Kirgistani i vendit të pestë. Ndeshjet e radhës janë kundër Iranit në shtëpi më 5 qershor dhe ndaj Uzbekistanit në transfertë më 10 qershor. m.p.
