Një ngjarje e rëndë është regjistruar pasditen e së enjtes në qendër të qytetit të Stuttgart-it, ku një automjet tip Mercedes G-Klasse ka hyrë në një grup këmbësorësh, duke shkaktuar disa të plagosur.
Incidenti ndodhi rreth orës 17:50 në një nga kryqëzimet më të frekuentuara të qytetit, pranë stacionit të tramvajit Olgaeck. Sipas dëshmive të para, makina ka përplasur disa kalimtarë në një kalim këmbësorësh, përfshirë edhe një grua me karrocë fëmije.
Pamjet nga vendngjarja tregojnë një karrocë fëmije të shkatërruar mbi shinat e tramvajit, duke rritur shqetësimet për pasoja më të rënda. Autoritetet lokale raportojnë se disa persona janë plagosur, mes tyre edhe në gjendje të rëndë, por numri i saktë ende nuk është konfirmuar.
Policia ka arrestuar drejtuesin e automjetit në vendngjarje dhe ka nisur hetimet për të zbuluar shkaqet e ngjarjes. Nuk dihet ende nëse bëhet fjalë për një aksident apo për një veprim të qëllimshëm.
Zona është rrethuar nga policia dhe qarkullimi i tramvajit dhe metrosë është pezulluar përkohësisht, ndërsa në terren ndodhen forca të shumta policore dhe ekipe emergjente. m.p.
