Gara për titull në kampionatin Italian vijon të jetë emocionuese, me Napolin që është vetëm 3 përballje larg fitimit të trofeut, ndërsa po ruan diferencën me zikaltrit e vendit të dytë.
Të shtunën të dyja skuadrat arritën të marrin fitore me rezultat minimal, aq sa vlen për marrjen e 3 pikëve. E para ishte skuadra e Antonio Contes e cila likujdoi Lecce-n në transfertë, me përballjen që u mbyll në shifrat 0-1.
Goli u shënua nga Raspadori në minutën e 24, por më herët napoletanëve iu anullua një gol me autor belgun Lukaku. Kaq mjaftoi dhe Napoli mori 3 pikë të cilat janë shumë të vlefshme në këtë pikë të garës, pasi mbeten dhe 3 sfida deri në përfundim.
Në mbrëmje Interi bëri detyrën, ndërsa lojtari që vulosi takimin ishte Kristjan Asllani që realizoi me penallti. Mesfushori shqiptar shënoi në minutën e 9-të, ndërsa trajneri Simone Inzaghi provoi rotacionin për faktin se në mesjavë luan duelin deciziv në Champions përballë Barcelonës. Napoli numëron 77 pikë në krye të klasifikimit, i ndjekur nga Interi me 74, teksa të dyja nuk rrezikohen nga skuadrat e tjera. m.p.
