Shpesh dëgjojmë këshillën klasike: “Mos përdor telefonin para gjumit.”
Por sipas kërkimeve të fundit, nuk është vetëm drita blu e ekranit që na prish gjumin, është mënyra si e përdorim rrjetin social para se të mbyllim sytë.
Një studim i ri nga psikologu dhe studiuesi i gjumit, Brian N. Chin, tregon se angazhimi emocional me rrjetet sociale është një nga faktorët kryesorë që po na prish cilësinë e gjumit, sidomos tek të rinjtë dhe adoleshentët.
Sot, shumica e të rinjve nuk arrijnë të flenë mjaftueshëm. Kjo nuk sjell thjesht lodhje, mungesa e gjumit lidhet me:
-Ankthin dhe depresionin
-Dobësim të memories dhe përqendrimit
-Rënie të performancës akademike
-Madje edhe me rreziqe për shëndetin kronik dhe jetëgjatësinë
Nuk është sa kohë rri në Instagram, por si ndihesh kur je aty
Studiuesit kanë zbuluar se frekuenca e përdorimit të rrjeteve sociale dhe përfshirja emocionale janë më të lidhura me cilësinë e dobët të gjumit sesa thjesht koha para ekranit.
Në një studim me 830 të rinj, u zbulua se:
-Ata që vizitonin shpesh rrjetet sociale dhe ndiheshin emocionalisht të lidhur me to kishin probleme më të mëdha me gjumin.
-Krahasimi social dhe ngarkesa mendore para gjumit ishin faktorë kryesorë që ndikonin në cilësinë e gjumit.
Ja disa mënyra se si rrjetet sociale dëmtojnë gjumin tënd:
Doomscrolling: Përmbajtje emocionale, debate, lajme negative, e mbajnë trurin të zgjuar dhe të stresuar.
Krahasimi social: Kur sheh postimet perfekte të të tjerëve, ndihesh keq për veten, gjë që shkakton ankth para gjumit.
Përdorimi i zakonshëm pas dritave të fikura: E bën gjumin më të shkurtër dhe cilësinë e tij më të ulët.
Frika për të mos mbetur jashtë (FOMO): Ndjenja që duhet të jesh gjithmonë i përditësuar të mban zgjuar më shumë se duhet.
Si ta përdorësh rrjetin pa e shkatërruar gjumin?
3 hapa të thjeshtë që funksionojnë sipas shkencës:
-Shmang përmbajtjen emocionale të paktën 30-60 minuta para gjumit.
-Lëre telefonin jashtë dhomës së gjumit ose aktivizo “Mos shqetëso”.
-Reflekto: Pyete veten “A dua vërtet të jem në këtë aplikacion tani?”/E.Ç
