Një studim i ri i botuar në revistën Nature Climate Change tregon se 10% më të pasurit e planetit janë përgjegjës për rreth 65% të rritjes së temperaturës globale që nga viti 1990. Ndërkohë, vendet dhe komunitetet më të varfra vuajnë pasojat më të rënda të krizës klimatike, përfshirë valët e të nxehtit dhe përmbytjet ekstreme.
“Studimi ynë tregon se ndikimet klimatike ekstreme nuk janë pasojë e emetimeve globale në përgjithësi, por lidhen drejtpërdrejt me stilin e jetesës dhe zgjedhjet e investimeve – të cilat nga ana tjetër janë të lidhura ngushtë me pasurinë,” tha Sarah Schöngart, autorja kryesore e studimit.
Sipas të dhënave, në vitin 2020 temperatura mesatare globale ishte 0.61°C më e lartë se në vitin 1990. Nga kjo rritje:
10% më të pasurit (me të ardhura mbi 42,980 euro në vit) janë përgjegjës për 65% të emetimeve që shkaktuan këtë rritje.
1% më i pasur (me të ardhura mbi 147,200 € në vit) kontribuoi në 20% të ngrohjes.
0.1% më i pasur (me të ardhura mbi 537,770 € në vit) është përgjegjës për 8% të rritjes.
“Ndotësit e pasur luajnë një rol kyç në ngjarjet ekstreme klimatike,” shtoi Schöngart, duke theksuar se këto gjetje përbëjnë një argument të fortë për politika klimatike që fokusohen në uljen e emetimeve nga të pasurit.
Ndërkohë, vendet e varfra – shumica pranë ekuatorit – janë më të ekspozuara ndaj pasojave ekstreme klimatike, si rritje e temperaturave, thatësira dhe përmbytje.
Për më tepër, gratë dhe vajzat janë ndër grupet më të prekura, sipas organizatës Climate Refugees. Ato përbëjnë 80% të popullsisë së zhvendosur globalisht për shkak të motit ekstrem. Kriza klimatike, sipas Save The Children, po thellon modelet ekzistuese të diskriminimit dhe dhunës ndaj grave.
“Ndryshimi i klimës po kontrollon gjithçka. Është koha të flasim për kompensime,” tha Amali Tower, themeluese e Climate Refugees, në një intervistë për Marie Claire Greece./e.s
