Më shumë se 70 artistë dhe muzikantë, që kanë përfaqësuar vendet e tyre në Eurovision ndër vite, kanë nënshkruar një letër të hapur duke kërkuar përjashtimin e Izraelit dhe transmetuesit të tij kombëtar, KAN, nga edicioni i këtij viti i Eurovision Song Contest.
Pjesëmarrja e Izraelit ka qenë temë e debatit që prej vitit të kaluar, për shkak të konfliktit të përshkallëzuar në Lindjen e Mesme. Në letrën drejtuar EBU-së dhe transmetuesve anëtarë të saj, artistët pretendojnë se pjesëmarrja e Izraelit cenon integritetin e festivalit dhe kërkojnë masa të menjëhershme ndaj vendit që, sipas tyre, është përgjegjës për “gjenocid në Gaza dhe për një regjim të gjatë pushtimi ndaj palestinezëve”.
“Ne nuk e pranojmë këtë standard të dyfishtë ndaj Izraelit… Izraeli duhet të përjashtohet nga Eurovision-i”, thuhet në letrën e firmosur nga 72 artistë.
Polemikat rreth përfshirjes së Izraelit në Eurovision 2024 janë rritur, me kritika ndaj EBU-së për hipokrizi, pasi Rusia u përjashtua në vitin 2022 për shkak të pushtimit të Ukrainës, ndërsa Izraeli është lejuar të garojë, pavarësisht situatës në Gaza.
Edhe vitin e kaluar, pjesëmarrja e Izraelit në konkurs u vu në rrezik kur këngëtares së tij iu kërkua të ndryshonte tekstin e këngës “October Rain”, për shkak të aludimeve ndaj sulmeve të 7 tetorit./e.t
