Papa Prevost ka bërë daljen e tij të parë surprizë: ai u kthye për të përshëndetur njerëzit në Palazzo del Sant’Uffizio ku jetonte. Papa Leo XIV është rikthyer kështu në vendin ku jeton që nga viti 2023, në Pallatin e Zyrës së Shenjtë.
Ai përshëndeti njerëzit në oborr, lejoi të fotografohej me ta dhe në fund u dha të gjithëve një bekim të thjeshtë.
Prej pasdites së djeshme, datë 8 Maj, ish- kardinali Robert Prevost është zgjedhur Papa i ri i Vatikanit. Kur ai doli në ballkonin me pamje nga Sheshi i Shën Pjetrit të enjten, ai tronditi botën. Për aq kohë sa dikush mund të kujtojë, është pranuar që një konklavë kardinalësh nuk do të zgjidhte kurrë një amerikan, raportojnë mediat amerikane.
Por kush është Papa Leo XIV (Robert Francis Prevost), Papa i 267-të i Kishës Katolike dhe i pari nga Amerika e Veriut
Robert Francis Prevost lindi më 14 shtator 1955 në Çikago, SHBA, nga një baba me origjinë franceze-kanadeze dhe një nënë me rrënjë spanjolle. Ai studioi matematikë në Universitetin Villanova dhe më pas teologji në Catholic Theological Union në Çikago. Në vitin 1977, u bashkua me Urdhrin e Shën Augustinit dhe u shugurua prift në vitin 1982.
Në vitin 1985, Prevost filloi misionin e tij në Peru, ku shërbeu si kancelar i prelaturës së Chulucanas dhe më pas si drejtues i seminarit augustinian në Trujillo për një dekadë. Për kontributin e tij, ai mori shtetësinë peruane në vitin 2015 .
Nga viti 2001 deri në 2013, Prevost shërbeu si prior i përgjithshëm i Urdhrit të Shën Augustinit. Në vitin 2014, u emërua administrator apostolik i dioqezës së Chiclayo në Peru dhe më pas u bë ipeshkëv i saj në vitin 2015. Në vitin 2023, Papa Françesku e emëroi si prefekt të Dikasterit për Ipeshkvijtë dhe president të Komisionit Papnor për Amerikën Latine .
Dhe dje, më 8 maj, pas vdekjes së Papës Françesku më 21 prill 2025, konklava e 133 kardinalëve zgjodhi Prevost si Papë në ditën e dytë të votimit. Ai mori emrin Leoni XIV, duke u bërë Papa i 267-të i Kishës Katolike dhe i pari nga Amerika e Veriut./e.s
