Bashkimi Evropian ka rënë dakord të vendosë një raund të ri sanksionesh ndaj Rusisë, duke kërcënuar se do të vijojë me një tjetër nëse vendi vazhdon të refuzojë armëpushimin 30-ditor pa kushte, të propozuar nga Shtëpia e Bardhë dhe ai që njihet si “Koalicioni i Vullnetarëve”.
Lëvizja vjen teksa presidenti ukrainas Volodymyr Zelensky ka sfiduar homologun rus Vladimir Putin që të ulet në tryezën e bisedimeve direkte për paqen në Turqi, një format i miratuar edhe nga presidenti Donald Trump, i cili ndodhet në Lindjen e Mesme dhe mund të udhëtojë drejt Stambollit.
“Unë besoj se nëse Putin nuk vjen në Stamboll dhe luan lojëra, atëherë është treguesi përfundimtar se ai nuk e do fundin e luftës”, ka thënë Zelensky.
Marrëveshja paraprake për sanksionet e reja, e 17-ta që prej shkurtit të vitit 2022 kur nisi lufta, u nënshkrua të mërkurën në mëngjes gjatë takimit të ambasadorëve të vendeve të BE-së dhe pritet të formalizohet nga ministrat e Jashtëm javën e ardhshme.
Hungaria, një zë kritik që ka bllokuar thuajse dy herë këtë vit ripërtëritjen e kufizimeve ekonomike ndaj Moskës, nuk i kundërshtoi masat.
Gjithashtu, bisedimet prapa skenës mes përfaqësuesve të vendeve anëtare kaluan pa përplasje dhe kontestime.
Edhe një herë, objektivi kryesor i sanksioneve është “flota hije”, që Kremlini e ka përdorur për të shmangur kufizimet e Perëndimit në tregtimin e naftës dhe për të ruajtur një burim të ardhurash jetik për financimin e luftës në Ukrainë. m.p.
