Një incident i rëndë ndodhi këtë mesditë në qendrën e numërimit të votave në Kashar, në KZAZ nr.30, ku Sekretari i Komisionit Zonal të Administrimit të Zgjedhjeve u godit nga një vëzhgues i kandidatit të Partisë Socialiste, Ornaldo Rakipi.
Shkak për konfliktin u bë kontestimi i një vote në të cilën ishin shënuar dy kandidatë, mes tyre edhe Rakipi. Vëzhguesit kërkuan që kjo votë të njihej në favor të tij, çka solli debat dhe përplasje fizike me Sekretarin e KZAZ. Në incident janë përfshirë katër persona, dy prej të cilëve janë shoqëruar nga policia.
Ndërkohë, brenda një automjeti që ndodhej në perimetrin e KZAZ-së, është vërejtur një çantë me para, çka ka ngritur dyshime të tjera lidhur me rrethanat e ngjarjes. Autoritetet vijojnë hetimet për të sqaruar të gjithë dinamikën dhe për të identifikuar përgjegjësit. m.p.
