Të paktën 16 persona kanë humbur jetën si pasojë e tornadove dhe stuhive të fuqishme që përfshinë pjesën qëndrore të Shteteve të Bashkuara nga mbrëmja e së premtes deri mëngjesin e së shtunës.
Sipas autoriteteve amerikane, 9 viktima janë regjistruar në Kentucky dhe 7 të tjerë në juglindje të Missourit. Erërat e fuqishme kanë shkaktuar dëme të mëdha materiale, duke dëmtuar mbi 5 mijë banesa dhe biznese, ndërsa më shumë se 700 mijë shtëpi dhe kompani mbetën pa energji elektrike.
Ekipet e emergjencës kanë qenë në terren gjatë gjithë kohës, duke ndihmuar qytetarët e prekur nga katastrofa, teksa është duke u bërë vlerësimi i plotë i dëmeve.
Të paktën dhjetëra persona janë plagosur dhe po marrin trajtim mjekësor në spitale të ndryshme në Kentucky dhe Missouri. Mediat amerikane raportojnë se situata ka qenë kritike për orë të tëra.
Shërbimet Meteorologjike Kombëtare në SHBA kanë deklaruar se rreziku më i madh i stuhive ka kaluar, por reshjet e shiut dhe erërat e forta do të vijojnë të ndikojnë në disa zona edhe në ditët në vijim./e.t
